“Монголын волейболын залуучуудын холбоо”-ноос зохиож буй 21 хүртэлх насны волейболчдын U21 АШТ (аварга шалгаруулах тэмцээн) дөрвөн өдрийн турш үргэлжилж, тэмцээний аварга багууд болон шилдэг тоглогчид тодорсоноор тэмцээн өндөрлөлөө.

Энэ удаагийн тэмцээнд эрэгтэй, эмэгтэй нийт 21 багийн 248 тоглогч, 35 багш/дасгалжуулагчдын багийн гишүүн болон тэмцээний зохион байгуулалтын ард (шууд дамжуулалт, статистик, гэрэл зураг медиа, заал арчилгаа, удирдлага менежмент)-д 20 хүн ажилласан бол дөрвөн өдрийн нийт 47 тоглолтыг 10 гаруй хүний бүрэлдэхүүнтэй шүүгчдийн баг дэнсэлж ажиллалаа.

2023 оны анхны тэмцээнийг санаачлан зохион байгуулсан Монголын волейболын залуучуудын холбоо болон тэмцээнийг бодит биелэлээ олоход тусалж, дэмжсэн ивээн тэтгэгч, хамтран ажиллагч байгууллагуудад талархал илэрхийлье.

Ингээд U21 АШТ 2023 тэмцээний шагналт байрын багууд болон шилдэгүүдийн мэдээллийг хүргэж байна.

БАГИЙН АМЖИЛТ

Эмэгтэй

Мөнгөн медаль: ХИЛЧИН, Хүрэл медаль: АЛТАН БӨМБӨГ

Өвөрхангай Хашхан баг нь багийн зохион байгуулалт, ойлголцол, гүйцэтгэл тун чамбай байж тэмцээний турш эсрэг багтаа нэг ч сэт алдалгүй түрүүлсэн нь гайхалтай байлаа.

Эрэгтэй

Мөнгөн медаль: ЭРЧИМ ДЦС4, Хүрэл медаль: ХЭНТИЙ ШОНХОР

Өмнөговь Шанх Транс баг эхний шатны хэсгийн тоглолтуудад сулхан мэт дутуу гүйцэтгэл, алдаа их гаргаж буй харагдаж байсан ч яван чангарсаар аваргын төлөө Эрчим клубын хүчтэй багийг хоёр үед буулган авч аваргаллаа.

ХУВИЙН АМЖИЛТ

Тамирчдын хувийн амжилтыг статистикт үндэслэн дүгнэсэн бөгөөд холбогч, чөлөөт хамгаалагчийн байрлалын тоглогчдыг тэмцээний шүүгчдийн бүрэлдэхүүн болон зохион байгуулагчдын багийн санал, дүгнэлтийг үндэслэн тодруулсан юм.

Шилдэг тоглогчдын танилцуулга мэдээллийг тун удахгүй нийтлэлд нэмэх болно.

Мөн тус тэмцээний хаалтын ажиллагааны үеэр:

Ч.Отгонбаяр (МВЗХ Ерөнхийлөгч)

Монголын волейболын залуучуудын холбооны 2022 оны хуваарь тэмцээнүүдийн сүүлийнх нь энэ тэмцээн байсан боловч Үндэсний дээд лигийн тэмцээнтэй давхцан тул хойшлуулсан байсан. Мөн бид төлөвлөгөөнийхөө дагуу 2022 оны турш зохион байгуулсан тэмцээнүүдэд тогтмол оролцож, тогтвортой амжилт үзүүлж буй баг/клубуудаас оны эцэст шилдэг клубыг тодруулахыг зорисон. Ингээд 2022 оны шилдэг эмэгтэй клубээр ХИЛЧИН, эрэгтэй клубээр ӨМНӨГОВЬ ШАНХ ТРАНС клубуудыг нэрлэж, цом гардуулж байна.

Ирэх жилийн U21 аварга шалгаруулах тэмцээнээр эргэн уулзацгаая.

Гэрэл зургийг: П. Ууган-Эрдэнэ, Г. Хүслэн

“Монголын волейболын залуучуудын холбоо”-ноос зохиож буй 21 хүртэлх насны волейболчдын U21 АШТ (аварга шалгаруулах тэмцээн)-ний хэсгийн шатны тоглолтууд амжилттай өндөрлөж, хагас шигшээ багууд тодорлоо.

Өнгөрсөн 21-ний өдрөөс хойш гурван өдөрт нийт 39 хэсгийн тоглолт болж өнгөрлөө. Эмэгтэй долоон баг шууд хэсгээс шалгарсан бол эрэгтэй 14 багийн дөрвөн хэсэг тус бүрээс шалгарсан хоёр нийт 8 баг дахин хоёр хэсэгт хуваагдаж, сүүлийн дөрвөн баг шалгарч үлдсэн юм.

Эмэгтэй багуудаас Хилчин, Хашхан багууд хожигдолгүйгээр тус тусын хэсгийг тэргүүлсэн бол “А” хэсгийн дэд байраар Ирвэсүүд баг шалгарсан. Харин тус өрсөлдөөнтэй байсан “B” хэсгийн дэд байраар Алтан бөмбөг клубын баг шалгарлаа.

Ийнхүү хагас шигшээ тоглолтууд 24-ний өглөө Хилчин – Алтан бөмбөг багуудын тоглолтоор үргэлжлэх эхлэх болно.

Эрэгтэй багуудаас нэг баг тун онцгой байгаа нь Хэнтий аймгийн нэр дээр оролцож буй Хэнтий Шонхор бөгөөд тэмцээний турш нийт 6 тоглохдоо нэг ч хожигдоогүй төдийгүй өрсөлдөгч багтаа нэг ч сэт/үе алдаагүй хагас шигшээд ирсэн юм.

Тоглогчдын хувийн амжилтаас харахад Хашхан багийн ахлагч Э. Хонгорзул давуулалтын оноо, довтолгооны оноо болон нийт оноогоор бүх эмэгтэй тоглогчдыг тэргүүлж байгаа бол эрэгтэй тоглогчдыг Тэнүүн-Огоо багийн дотвлогч С. Буянтогтох довтолгооны болон нийт оноогоор бүх тоглогчдыг тэргүүлсэн байна. Харамсалтай нь Тэнүүн-Огоо баг хагас шигшээд хараахан шалгарч чадаагүй билээ.

U21 АШТ тэмцээний дэлгэрэнгүй

Тус тэмцээнийг зохион байгуулагчдын зүгээс тэмцээний хүртээмжийг нэмэгдүүлэх, тэмцээнд оролцогч баг, тамирчид, дасгалжуулагчдад тоглолтын дүн шинжилгээ хийхэд дөхөм болох мөн тэмцээнд оролцогч багуудын хөгжөөн дэмжигч үзэгчдийг мэдээлэл байлгах зорилгоор Facebook орчинд хаалттай групп үүсгэн шууд дамжуулж байгаа ажээ.

Энэхүү групп нь төлбөртэй бөгөөд тухайн төлбөрийг шууд дамжуулалт тоног төхөөрөмж, шууд дамжуулалттай холбоотой ажиллах хүчний зардал зарцуулж, багахан хувийг мөн тэмцээний зохион байгуулалтын хүрээнд баг, тоглогчдод зарцуулахаар төлөвлөсөн юм байна.

Та бүхэн Волейболын залуучуудын холбоо хаягаар холбогдож, тус группийн талаар мэдээлэл аваарай.